ފުލުސް މީހާގެ ގައިގާ ސައިކަލުން ޖެއްސުމަށްފަހު ފިލައިގެން ދިޔަ މީހާ ހައްޔަރުކޮށްފި

ބޮޑުތަކުރުފާނު މަގު ކަޅުތުއްކަލާކޮށި ކައިރީގައި ވީސީޕީއެއް ޖަހައިގެން ވެހިކަލް ޗެކްކުރުމުގެ މަސައްކަތްކުރަމުން ދިޔަ ފުލުސް މީހާގެ ގައިސާ ސައިކަލުން ޖައްސައި ފިލައިގެންދިޔަ މީހާ ހައްޔަރުކޮށް އެ މައްސަލަ ސީރިއަސް އެންޑް އޮގަނައިޒްޑް ކްރައިމް ޑިޕާޓްމަންޓުން ދަނީ ތަހުޤީޤު ކުރަމުން ކަމަށް ފުލުހުން ވިދާޅުވެއްޖެއެވެ.

ކުރީގެ ރައީސް މައުމޫން އިސްދޫ ހަވިއްތަމަތީގައި

ފުލުހުން ވިދާޅުވީ މިމައްސަލައާއި ގުޅިގެން މިއަދު މެންދުރު ހައްޔަރުކޮށްފައި އުމުރުން 18 އަހަރުގެ ފިރިހެނެކެވެ. އޭނާ އަކީ އިންޖީނުލީ އެއްގަމު އުޅަނދު ދުއްވުމުގެ ލައިސަންސް އޮންނަ މީހެއް ނޫން ކަމަށް ވެސް ފުލުހުން ވިދާޅުވިއެވެ.

ރޭ 21:45 ހާއިރު ހާއިރު ބޮޑުތަކުރުފާނު މަގުން ދުއްވާފައި ދިޔަ ސައިކަލް މަޑުކުރަން އެންގުމުން މަޑުނުކޮށް ގޮސް ފުލުސްމީހާގެ ގައިގާ ޖެއްސުމުގެ ސަބަބުން އޭނާގެ ކަނާތު ފައިގެ ކުޑަހުޅު ނެއްޓި ކަށިގަނޑުން ބައެއް ބިންދައިގެން ގޮސް ބޮޑެތި އަނިޔާތައް ވެފައިވެއެވެ. އޭނާއަށްއައިޖީއެމް ހޮސްޕިޓަލުން ފަރުވާދެމުންދާއިރުއިތުރު ފަރުވާއަށް އިންޑިޔާއަށް ފޮނުވުމަށް ވާންޖެހޭ ތައްޔާރީތައް  ދަނީ ކުރަމުންނެވެ.

ފުލުހުންގެ ވެބްސައިޓްގައި އާންމު ކުރައްވާފައިވާ ޚަބަރެއްގައި ވިދާޅުވީ "ފުލުހުންނަކީ ރައްޔިތުންގެ ސަލާމަތާއި ރައްކަތެރިކަން ދަމަހައްޓައި ޤާނޫނާއި ޤަވާއިދުތައް ތަންފީޒްކޮށް އަމާން މާހައުލެއް ދެމެހެއްޓުމަށް ތިބޭ ބަޔަކަށްވީ ހިނދު، މަގުމަތީގެ ސަލާމަތާއި ރައްކާތެރިކަމާއި ގުޅޭގޮތުން ފުލުހުން އަންގާ އެންގުމާއި އެއްގޮތަށް ޢަމަލުކޮށް، ފުލުހުންނަށް އެއްބާރުލުން ދެއްވުމަކީ ހުރިހާ ރައްޔިތުންނަށް އޭގެ ފައިދާ އާއި މަންފާ ލިބިގެންދާނެކަމެކެވެ."

ލ.އިސްދޫ އަށް 360 ކިލޯވޯޓްގެ ޖަނަރޭޓަރެއް ގެންދިއުމުގެ އެއްބަސްވުމެއްގައި ސޮއިކޮށްފި

ފެނަކަ ކޯޕަރޭޝަން ލިމިޓެޑުގެ ލ.އިސްދޫ ބްރާންޗް އިންޖީނުގެއަށް 360 ކިލޯވޯޓްގެ ޖަނަރޭޓަރެއް ގެންދިއުމުގެ އެއްބަސްވުމެއްގައި ޔުނި އިންޖީނިއަރ ޕްރައިވެޓް ލިމިޓެޑާއިއެކު ފެނަކަ ކޯޕަރޭޝަން ލިމިޓެޑުން ސޮއިކޮށްފިއެވެ. 

އޮކްޓޯބަރު 6 ގައި  ފެނަކަ ކޯޕަރޭޝަން ލިމިޓެޑްގެ ހެޑް އޮފީހުގައި މެންދުރު 02:00ގައި ބޭއްވި ރަސްމިއްޔާތެއްގައި ފެނަކަ ކޯޕަރޭޝަން ލިމިޓެޑްގެ ފަރާތުން ސޮއިކުރެއްވީ މެނޭޖިންގ ޑިރެކްޓަރ އަހްމަދު ޝަރީފެވެ. ޔުނި އިންޖީނިއަރ ޕްރައިވެޓް ލިމިޓެޑްގެ ފަރާތުން ސޮއިކުރެއްވީ އެކުންފުނީގެ ޖެނެރަލް މެނޭޖަރ ޤައިސް އިސްމާއިލްއެވެ. 

މިއެއްބަސްވުމުގައި ސޮއިކުރެއްވުމަށްފަހު އެމް.ޑީ އަހްމަދު ޝަރީފް ވިދާޅުވެފައިވަނީ  އިސްދޫއަށް ދިމާވި ކަރަންޓް ކެނޑުމުގެ މައްސަލައަށް މިހާރުވެސް ވަނީ ވަގުތީ ހައްލެއް ހޯދާދެވިފައިވާކަމަށާއި އިސްދޫއަށް މިގެންދާ ޖަނަރޭޓަރު މިއަންނަ އާދިއްތަ ދުވަހު ގެންދެވޭނެ ކަމަށާއި ޖަނަރޭޓަރު އިންސްޓޯލް ކުރެވި ޓެސްޓް ކުރެވި ހަފްތާ ނިމެންވާއިރަށް ކަރަންޓުގެ މައްސަލައަށް ދާއިމީ ހައްލެއް ލިބިގެންދާނެކަމަށެވެ. 

މިރަސްމިއްޔާތުގައި ރައްޔިތުން މަޖިލީހުގެ އިސްދޫ ދާއިރާގެ މެންބަރު އަޙްމަދު ރަޝީދު އިބްރާހީމް ވަނީ 360 ވޯޓްގެ ޖަނަރޭޓަރެއް އިސްދޫއަށް ލިބި ރަށުގެ ރައްޔިތުންނަށް ދިމާވެފައިވާ ކަރަންޓުގެ މައްސަަލައަށް މިހާއަވަސް ދާއިމީ ހައްލެއް ހޯއްދަވައިދެއްވި ކަމަށްޓަކައި ރައީސުލް ޖުމްހޫރިއްޔާ އަބްދުލްﷲ ޔާމީން އަބްދުލް ޤައްޔޫމަށާއި ފެނަކަ ކޯޕަރޭޝަން ލިމިޓެޑަށް ޝުކުރު އަދާކުރައްވާފައެވެ.

ދިވެހި ފިލްމު "މިކޮއެ ބައްޕަ ބައޭ ބައޭ" ލ. އަތޮޅުގެ ރަށްތަކުގައި ދައްކަނީ

ކާމިޔާބު ފިލްމުތަކެއް އުފައްދަމުން އަންނަ ޑާރކް ރެއިން އެންޓަރޓެއިންމެންޓް ސްޑޫޑިއޯއިން އެއްމެ ފަހުން ސިނަމާކޮށްފައިވާ ފިލްމު 'މިކޮއެ ބައްޕަ ބައޭ ބައޭ' ލ. އަތޮޅުގެ ރަށްތަކުގައި ދެއްކުމަށް ހަޖަޖެހިފައިވާކަން މި ސައިޓަށް އެނގިއްޖެއެވެ.

މިގޮތުން ލ. އަތޮޅު ހިތަދޫގައި ސެޕްޓެމްބަރ 2، މާމެންދޫ ސެޕްޓެމްބަރ 2، ގާދޫގައި ސެޕްޓެމްބަރ 4، ފޮނަދޫގައި ސެޕްޓެމްބަރ 5، ގަމުގައި ސެޕްޓެމްބަރ 6، މާބައިދޫގައި ސެޕްޓެމްބަރ 7، ދަނބިދޫގައި ސެޕްޓެމްބަރ 8، އިސްދޫގައި ސެޕްޓެމްބަރ 9 އަދި ކަލައިދޫގައި ސެޕްޓެމްބަރ 10 ގައި ދެއްކުމަށް ހަމަޖެހިފައިވާކަމަށް މި ފިލްމު ލ. އަތޮޅުގައި ދެއްކުމަށް ދީފައިވާ 'މަންދޭރަ ޕްރޮޑަކްޝަންސް' އިން ބުނެއެވެ.

ޕްރޮޑަކްޝަންގައި 3 އަހަރަށްވުރެ ގިނަދުވަހު އޮތުމަށްފަހު މަޙުދީގެ ސްކްރީންޕްލޭއަކަށް ތައްޔާރުކޮށްފައިވާ “މިކޮއެ ބައްޕަ ބައޭ ބައޭ” 12 އޯގަސްޓް ގައި އޮލިމްޕަސް ސްކްރީންގައި ޕްރިމިއަރ ކޮށްފައިވާއިރު، މި ފިލްމުގެ ފުރަތަމަ ޝޯއަށްފަހު މަޙުދީ ވަނީ ފިލްމުގައި އެކި ގޮތްގޮތުން މަސައްކަތްކުރި ފަރާތްތަކަށް ވަކިވަކިން ޝުކުރު އަދާކޮށް، އެމީހުންގެ މަސައްކަތައް ސާބަސްދީ، ދިގު ފޭސްބުކް ސްޓޭޓަސްއެއް ލިޔެފައެވެ.

މަޙުދީގެ ސްޓޭޓަސްގައި، މީގެ ކުރިން މާބޮޑަށް ދެކެވިފައިނުވާ، ނަމަވެސް ފާހަގަކުރަންޖެހޭ ކަންތައްތަކެއް ހުއްޓެވެ. އެގޮތުން ފިލްމަކީ، ލ. ފޮނަދޫ ޕްރޮޑަކްޝަން ހައުސްއެއް ކަމަށްވާ “މަންދޭރާ ޕްރޮޑަކްޝަން” ގެ އަޙުމަދު ރަޝީދު ލިޔެފައިވާ، ހަމަ މިނަމުގައި ކުރު ފިލްމަކަށް ތައްޔާރުކި ސްކްރީންޕްލޭގެ ހުރިހާ ޙައްގެއް ގަތުމައްފަހު، ފީޗަރ ފިލްމެއްގެ ގޮތުގައި މަޙުދީ އަލުން ލިޔުނު ސްކްރީންޕްލޭ އަކަށް ވާއިރު، މީގެ އަސްލު ސްކްރިޕްޓަށްޓަކައި މަޙުދީ ވަނީ އަޙުމަދު ރަޝީދަށް ވަރަށް ބޮޑަށް ޝުކުރު އަދާކޮށްފައެވެ.

ސްޓޭޓަސްގައި މަޙުދީ ފާހަގަ ކޮށްފައިވާގޮތުން، މި ފިލްމުގެ ސްކްރީންޕްލޭ ލިޔަމުން ދިޔައިރުވެސް، ލީޑް ރޯލަށް ރިޝްމީ ނެގުމަށް ވަނީ ވިސްނާފައެވެ. އަދި ފިލްމުގައި ރިޝްމީ ދައްކައިދީފައިވާ އެކްޓިންގ އަށް ބަލާއިރު، ރިޝްމީއަށްވުރެ މި ފިލްމަށް ވަކި ރަނގަޅު އެކްޓެރެސްއެއް ނެތްކަން މަޙުދީ ވަނީ ފާހަގަ ކޮށްފައެވެ.

އަދި ފިލްމުގައި ފިރިހެން ލީޑްރޯލް ކުޅޭފައިވާ މުޙައްމަދު މަނިކަކީ އަބަދުވެސް މޮޅު އެކްޓަރެއް ކަމަށާއި މި ފިލްމުގައިވެސް އެކަން ފެނިގެން ގޮސްފައިވާކަން މަޙުދީ ފާހަގަ ކުރިއެވެ.

މި ފިލްމުގައި ކެމެރާމަނެއްގެ ހައިސިއްޔަތުން އަލީ ޝިފާއު (ޗިއްޕެ) ކޮށްދީފައިވާ މަސައްކަތާއި ނުލައި، ސްކްރީންޕްލޭއެއް އަދި ޑައިރެކްޓަރެއް ކުރާނީ ކީއްތޯ ސުވާލުކޮށް، މަޙުދީ ވަނީ ޗިއްޕެއަށް ޝުކުރު އާދާކޮށްފައެވެ.

އަދި ހުރިހާކަމެއް ފެއިލްވެގެންދާ ހާލަތުގައި އެކަންކަން ހަމައަކަށް އެޅުވެނީ އަޙުމަދު ޝިނާންގެ ކުޅަދާނަ ފަންނުވެރިކަމުންކަން ފާހަގަކޮށް، މަޙުދީ ވަނީ ޝިނާންގެ ހުނަރުވެރިކަމަކީ މަޙުދީގެ “ވިސްނުމުން ބޭރުގައިވާ” ކަމެއްގެ ގޮތުގައި ސިފަކޮށްފައެވެ.

ފިލްމުގެ މިއުޒިކް ހަދާފައިވާ ކުޅަދާނަ މިއުޒީޝަން، މުހައްމަދު އިކްރާމްގެ މަސައްކަތް އަބަދުވެސް ފާހަގަކުރާ މަޙުދީ ވަނީ، އިކްރާމްގެ މަސައްކަތުން “މިކޮއެ ބައްޕަ ބައޭ ބައޭ” އަށް އެންމެ ފުރިހަމަ ފީލް ގެނެސްދެވިފައިވާކަން ފާހަގަކޮށްފައެވެ.

ފިލްމުގެ ޑައިރެކްޓަރ ރަވީ ފާރޫޤަށް އޮތީ މަހުދީގެ ސުވާލެކެވެ. “ތިންވަނަ ފިލްމައިގެން އުޅެންވީނުންހެއްޔެވެ؟”

ކުރު ނަމަވެސް، އެންމެ މުހިއްމު ޝުކުރެއް މަޙުދީ އަދާކޮށްފައިވަނީ ފިލްމުގެ ޕްރޮޑިއުސަރ މުޙައްމަދު އަލީ (މޮގަރ) އަށެވެ. ތަފާތު ޖޮންރާތަކުގެ ފިލްމުތައް ދިވެހި ފިލްމު އިންޑަސްޓްރީއަށް ނެރުމަށް މޮގަރ ކުރާ މަސައްކަތް ފާހަގަކޮށް، “މިކޮއެ ބައްޕަ ބައޭ ބައޭ” ޕްރޮޑިއުސް ކުރުމުގެ ރިސްކު ނަގަން އެއްވެސް ޕްރޮޑިއުސަރަކު ބޭނުން ނުވި ވަގުތު، މިކަމަށް އިސްނެގި ކަމަށްޓަކައި މަޙުދީ ވަނީ މޮގަރއަށް ޝުކުރު އަދާކޮށްފައެވެ.

 “މިކޮއެ ބައްޕަ ބައޭ ބައޭ” އަކީ ރަވީ އާއި މަޙުދީ އުފައްދަން ގަސްދުކުރި ދެ ކެރެކްޓަރުން/އެއް ތަނެއްގައި/އެއް ދުވަހެއްގެ ތީމްއަށް ތައްޔާރުކުރާ ޓްރިލޮޖީގެ ތެރެއިން 2 ވަނަ ފިލްމެވެ. މިތީމްގެ ފުރަތަމަ ފިލްމަކީ “އިނގިލި” އެވެ.

"މިކޮއެ ބައްޕަ ބައޭ ބައޭ" 3 އަހަރުގެ އިންތިޒާރު ޖަސްޓިފައިކޮށްދީފި

ލީޑް ކާސްޓް: މުޙައްމަދު މަނިކު، އައިޝަތު ރިޝްމީ

ކާސްޓް: ކޮއްޔަ ހަސަން މަނިކު، އަލީ ވަހީދު

ޕްރޮޑިއުސަރ: މުޙައްމަދު އަލީ (މޮގަރ)

ޑައިރެކްޓަރު: ރަވީ ފާރޫގް

ސްކްރީންރައިޓަރު: މަޙުދީ އަޙުމަދު

ސިނެމެޓޯގްރެފީ: އަލީ ޝިފާއު

ސްޓޫޑިއޯ: ޑާކް ރެއިން އެންޓަޓެއިންމަންޓް

ޖޮންރާ: ސަސްޕެންސް ތްރިލަރ

ފިލްމުގެ ދިގުމިން:  135 މިނިޓް

ޕްލޮޓް

މި ފިލްމު ފެށިގެން އަންނަ އިރު އަހްމަދު ފަޒީލް / މުހައްމަދު ސަލީމް (މަނިކު) އަށް ހޭލެވެނީ އޭނާ އަށް ބީރައްޓެހި މާހައުލަކަށެވެ. ކޮޓަރި ތެރެއިން ފެންނަނީ މުޅިންވެސް އާ ތަކެއްޗެވެ. ކޮޓަރީގައި ހުރި ތަކެއްޗަށް ބަލަމުން ދިޔައިރު އެންމެ ތަފާތު އަދި އަޅައިގަންނަ އެއްޗަކަށް އޭނަ އަށް ފާހަގަ ކުރެވެނީ ބޭބީ މޮނިޓާރ އެކެވެ. ކުޑަ އިރުކޮޅެއް ފަހުން މި މޮނިޓަރ އިން ކުޑަކުއްޖަކު ރޯ އަޑު އިވެއެވެ. އަދި ހަމަ އެއާއިކު އަންހެނަކު އެކުއްޖާ އަށް ލަވަ ކިޔައިދީ މަސަލަސް ކުރާ އަޑު އިވެއެވެ.

މިހައިރާން ކަމުގައި ހުއްޓާ ދެން އެންމެ އަޖައިބު ކުރުވަނިވި ކަމަކަށް ފަޒީލް/ސަލީމް އަށް ފާހަގަ ކުރެވެނީ އޭނާގެ އިނގިލީގައި އަޅާފައި އޮންނަ ކައިވެނީގެ އަނގޮޓިއެވެ. މިކަމުގެ ސަބަބުން ފަޒީލް/ސަލީމަށް އޭނާ އަކީ ކާކުކަން އޮޅެއެވެ.

އަދި އޭގެ ކުޑަ އިރުކޮޅެއް ފަހުން ނިޝާ/ޝިފާ (ރިޝްމީ) އެކޮޓަރިއަށް ވަނުމަށްފަހު ފަޒީލް/ސަލީމުގެ އަނބިމީހާގެ ގޮތުގައި ހަރަކާތްތެރިވާން ފަށައެވެ. އަދި ފަޒީލް/ސަލީމް އަށް އެއީ ފަޒީލްގެ ގޮތުގައި ވިސްނައިދިނުމަށް މަސައްކަތް ކުރެއެވެ. އަދި ނުރައްކާތެރި އެކްސިޑެންޓެއްވެ ފަޒީލް/ސަލީމް އަށް ކުރީގެ ހަނދާންތައް ނެތި އަދި ހުންނާނީ ހަމަ އެކަނި އެންމެ ފަހުގެ ހަނދާންތައް ކަމަށްބުނެ ވިސްނައިދެއެވެ. އަދި ރަނގަޅު ކުރުމަށް ޑޮކްޓަރ ދީފައި ހުރި ބޭސްތަކެއް ކަމަށްބުނެ ބޭސްކާންދެއެވެ.

އެހެން ނަމަވެސް ކުރީގެ ހަނދާންތައް އެއްވެސް ވަރަކަށް އަންނަ ގޮތް ނުވުމުން ފަޒީލް/ސަލީމްގެ ގާތަށް ރުޅި އައިސް ކޮންޓްރޯލުން ނައްޓައެވެ. އެހިސާބުން ޝިފާ/ނިޝާ އަށް އޭނާގެ ދަރިފުޅު ސަލާމަތްކޮށް ހިމާޔަތް ކުރުމަށް ފަޒީލް/ސަލީމަށް ހަމަލާ ދިނުމަށް މަޖުބޫރުވެއެވެ.

ކައިވެންޏާއި ދަރިފުޅު ސަލާމަތް ކުރުމަށް ނިޝާ/ޝިފާ އެތައް މަސައްކަތެއް ކުރެއެވެ. އެމީހުންގެ މާޒީ އަދި މިހާރުގެ ހާލަތު އެކި އެތިކޮޅުކޮޅުގެ ގޮތުގައި ހަނދާނަށް އައިސް އެންމެ ފަހުން ހަޤީޤަތް ހާމަވެއެވެ.

އެކްޓިންގ

މި ފިލްމު ބަލައިލުމުން އެންމެ ބޮޑަށް ފާހަގަވި އެއް ކަމަކީ ފިލްމުގެ ކޮންމެ ސީންއެއް އޭގެ އެންމެ ފުރިހަމަ ފެންވަރުގައި ގެނެސްދިނުމަށް ކުރެވިފައިވާ ބުރަ މަސައްކަތެވެ. ކުދި ކުދި ޑީޓެއިލްތަކަށް ދީފައިވާ އަހައްމިއްޔަތުކަމެވެ. އާ ކަންކަން ތަޖުރިބާ ކުރުމަށް ނަގާފައިވާ ރިސްކެވެ.

ފިލްމުގެ މުޅި ކާސްޓްގެ ފަރާތުންވެސް އެކްޓިންގ ގައި ފެނުނު އެއް ކަމެއް އެބަ އޮތެވެ. ޕަރފެކްޓް އެކްސްޕްރެޝަންއެވެ. ކޮންމެ ސީންއެއްގައި، ކޮންމެ އެކްޓަރަކުވެސް ވަނީ ވަރަށް ފުރިހަމައަށް އިޙުސާސްތައް މޫނުމަތިން ދައްކައިދީފައެވެ. ޚާއްސަކޮށް، ފިލްމުގެ ލީޑް ދެ ކެރެކްޓަރގެ ފަރާތުން މިކަން ފެނިގެން ދިޔައެވެ. ހާއްސަ ގޮތެއްގައި ރިޝްމީގެ އެކްޓިންގ ފާހަގަ ކޮށްލެވެއެވެ. ކޮންމެ މަންޒަރެއްގައިވެސް މޫނު މަތީގެ އެކްސްޕްރެޝަން އަސްލާ އެއްވެސް ތަފާތެއް ނެތްކަން ފާހަގަކުރެވެއެވެ. މިފިލްމުން ރިޝްމީ އަކީ ހަމައެކަނި ނެށުންތެރިއެއް ނޫން ކަމާއި މޮޅު އެކްޓެއް ކުރެވިދާނެ އެކްޓްރެސް އެއްކަން ސާބިތުކޮށްދީފައިވެއެވެ.

މި ފިލްމުގެ ކޮންމެ ސީން އެއް ބަލަމުން ދާއިރުވެސް ދެން ފެންނާނީ ކޮން މަންޒަރެއް ނުވަތަ ވާނީ ކިހިނެއްކަން އަންދާޒާ ކޮށްލަންވެސް ނޭނގެއެވެ. ނުރައްކަލެއް ކުރިމަތިވާން އުޅޭ ކަމުގެ އިންޒާރުދީ ބެލުންތެރިން އިތުރަށް ޝައުގުވެރިވާނެ ކަހަލަ ގޮތަކަށް މަންޒަރުތައް އަތުރާލާފައިވާކަން ފާހަގަ ކުރެވެއެވެ.

މިފިލްމުގައި ރިޝްމީ ދައްކުވައިދީފައިވާ އެކްޓިން އަކީ މީގެކުރިން އެހެން އެއްވެސް ފިލްމެއްގައި އޭނާ ދައްކާފައިވާ އެކްޓިން އެއް ނޫނެވެ. އެއަށްވުރެ މާ ފުރިހަމަ އެކްޓިން އެކެވެ. މިގޮތުގައި ހިފަހައްޓާލައިފިނަމަ ކައިރި މުސްތަގްބަލެއްގައި ރާއްޖޭގެ އެންމެ މޮޅު އެކްޓްރެސްގެ މަގާމު ލިބުމުގެ ފުރުސަތު ބޮޑު ކަމަށް ޤަބޫލުކުރެވެއެވެ.

މަނިކުގެ ކުރީގެ ފިލްމްތަކާއި އަޅާ ބަލާއިރު މާބޮޑު ތަފާތެއް ފާހަގަކުރެވިފައެއް ނެތެވެ. އޭނާގެ މޮޅު އެކްޓިން މިފިލްމްގައިވެސް ފެނިގެންދެއެވެ. މަނިކުގެ ކެރިއަރުގެ ކުރީކޮޅުގައި އޮފީސްތަކުގެ ޑްރާމާ މުބާރާތަށް ސިފައިން ތައްޔާރުކުރި “ސިފަ” ގައި މަނިކުގެ ފަރާތުން ފެނިގެން ދިޔަ އެކްޓިން އާއި ގުޅިގެން ރާއްޖޭގެ އެންމެ ކުޅަދާނަ އެއް އެކްޓަރަށް އޭނާ ވާނެކަމަށް ޤަބޫލުކުރެވުނު ކުރެވުން ހަޤީޤަތަކަށް ވެފައިވާކަން މި ފިލްމުން އޭނާ ވަނީ ސާބިތުކޮށްދީފައެވެ.

ކެމެރާގެ ފުރަގަހުން

ކުރިންވެސް ފާހަގަ ކުރެވުނު ފަދައިން ފިލްމުގެ ކޮންމެ ސީންއެއް އޭގެ އެންމެ ފުރިހަމަ ފެންވަރުގައި ގެނެސްދިނުމަށް ބުރަ މަސައްކަތްތަކެއް ކުރެވިފައިވާ ފިލްމު ބަލައިލުމުން ފާހަގަވިއެވެ. ކުދި ކުދި ޑީޓެއިލްތަކަށް ދީފައިވާ އަހައްމިއްޔަތުކަން ދީފައިވާކަން ފާހަގަ ވިއެވެ. އާ ކަންކަން ތަޖުރިބާ ކުރުމަށް ނަގާފައިވާ ރިސްކް ފާހަގަވިއެވެ. މި ހުރިހާކަމެއް މިހެން ހުރިއިރު، މާ ގިނަ ވާހަކަތަކެއް ނުދައްކައި، ބުނަން ޖެހެނީ މި ފިލްމުގެ ޑައިރެކްޝަން ވަރަށް، ވަރަށް، ވަރަށް ފުރިހަމަ ކަމަށެވެ.

ފިލްމުގެ އެޑިޓިންގ އަދި ކަލަރ ކަރެކްޝަންއާއި މެދު އެއްޗެކޭ ބުނާވަރަށްވުރެ އެ މަސައްކަތް ފުރިހަމައެވެ.

ފަހުބަސް

މިފިލްމަކީ މިހާތަނަށް ރާއްޖޭގެ ސިނަމާގައި އެޅުވި އެންމެ މޮޅު އެންމެ ތަފާތު އެއް ދިވެހި ފިލްމެވެ. ފިލްމު ބެލުމަށް 3 އަހަރު ކުރި އިންތިޒާރު މިވަނީ ޖަސްޓިފައި ވެގެން ގޮސްފައެވެ.

މިއަދު ބާއްވަން އުޅުނު ޕީ.ޕީ.އެމްގެ އިސްދޫ ޕްރައިމެރީ ބާޠިލުކޮށްފި

ކުރިޔަށް އޮތް ލޯކަލް ކައުންސިލް އިންތިޚާބުގައި ޕްރޮގްރެސިވްޕާޓީ އޮފް މޯލްޑިވްސް (ޕީ.ޕީ.އެމް) ގެ ފަރާތުން ރަށުކައުންސިލަށް ކުރިމަތިލާނެ މީހުން ކަނޑައެޅުމަށްބާއްވާ ޕްރައިމަރީ މިއަދު މެންދުރު 13:00 ގައި ބާއްވާގޮތަށް އެޕާޓީއިން ކަނޑައަޅާފައިވަނިކޮށް ކުއްލިއަކަށް ޕްރައިމެރީ ނުބާއްވާގޮތަށް ހަމަޖައްސައިފިއެވެ. އެޕާޓީގެ އިސްދޫ ގޮފީގެފަރާރުން މިސައިޓަށް މަޢުލޫމާތުދެއްވި އޮފިޝަލަކު މިއަދު ވިދާޅުވީ، މިގަޮތަށް ހަމަޖެއްސިކަމަށްވަނީ އިސްދޫގައި ހިމެނޭކަލައިދޫ އަކީ ވަކި ރަށެއްގެ ގޮތުގައި ސަރުކާރުން ހަމަޖެއްސެވުމާއި ގުޅިގެން އިންތިޒާމު ކުރަންޖެހޭ ކަންތައް ތަކެއް ހުރުމުން ކަމަށެވެ. މިފަހަރުގެ ޕްރައިމަރީގައި 5 މީހަކު ވާދަކުރެއެވެ. އެއީ. 1. ޔޫސުފް ޢުމަރު، ބީޗްހައުސް، 2. އަޙްމަދު ފައިސައިލް، މާފޮޅޭވިލާ، 3. އިބްރާހީމް ޢަލީ، މީރޫޒް، 4. މުޙައްމަދު މައުސޫމް، ޒުނޯރިޔާ، 5. އައިމިނަތު އަޙްމީލާ، އޯކިޑްމާގެ އެވެ.

ޕީ.ޕީ.އެމް އިސްދޫ ޕްރައިމަރީ މިއަދު ބާއްވަނީ

ކުރިޔަށް އޮތް ލޯކަލް ކައުންސިލް އިންތިޚާބުގައި ޕްރޮގްރެސިވްޕާޓީ އޮފް މޯލްޑިވްސް (ޕީ.ޕީ.އެމް) ގެ ފަރާތުން ރަށުކައުންސިލަށް ކުރިމަތިލާނެ މީހުން ކަނޑައެޅުމަށްބާއްވާ ޕްރައިމަރީ މިއަދު މެންދުރު 13:00 ގައި ބާއްވާގޮތަށް އެޕާޓީއިން ކަނޑައަޅާފައިވާކަމަށް އެޕާޓީގެ އިސްދޫ ގޮފީގެފަރާރުން މިސައިޓަށް މަޢުލޫމާތުދެއްވި އޮފިޝަލަކު މިއަދު ވިދާޅުވެއްޖެއެވެ. މިފަހަރުގެ ޕްރައިމަރީގައި 5 މީހަކު ވާދަކުރެއެވެ. އެއީ. 1. ޔޫސުފް ޢުމަރު، ބީޗްހައުސް، 2. އަޙްމަދު ފައިސައިލް، މާފޮޅޭވިލާ، 3. އިބްރާހީމް ޢަލީ، މީރޫޒް، 4. މުޙައްމަދު މައުސޫމް، ޒުނޯރިޔާ، 5. އައިމިނަތު އަޙްމީލާ، އޯކިޑްމާގެ އެވެ. އެޕާޓީގެ ފަރާތުން މިފަހަރުގެ ޕްރައިމަރީގައި 2 މީހުން ނެގުމަށް ވަނީ ނިންމާފައެވެ.
ސަރުކާރު ކޯލިޝަންގައި ހިމެނޭ ޕާޓީތަކުގެ ތެރެއިން އެއް ފުރުޞަތު ޖުމްހޫރީ ޕާޓީއަށް ދީފައިވާއިރު އަނެއް ދެފުރުޞަތުދީފައިވަނީ ކައިދޫ އަވަށަށެވެ. ނަމަވެސް ރައީސް ޔާމީންގެ ޤަރާރަކުން ކަލައިދޫއަކީ ވަކި ރަށެއްގެ ގޮތުގައި އިއްޔެވަނީ ހަމަޖައްސާފައެވެ. އެހެންކަމުން އެ ޕާޓީއިންވެސް އަދި އެހެންޕާޓީތަކުންވެސް އަލުން ޕްރައިމަރީ ބާއްވާނެކަމަށް މިހާރުވަނީ ބެލެވިފައެވެ.

ލ. އަތޮޅު ކައުންސިލްގެ ޔައުމިއްޔާ 9

`
ހައްދުންމަތީ އަތޮޅު ކައުންސިލްގެ އިދާރާ
           ފޮނަދޫ
         ދިވެހިރާއްޖެ. 


11 އޭޕްރީލް 2011 ގައިބޭއްވުނު އަތޮޅުކައުންސިލްގެ ނުވަވަނަ ޖަލްސާގެ ޔައުމިއްޔާ

2011 އޭޕްރީލް 11 ވަނަދުވަހު ހެނދުނު 09:00 ގައި އަތޮޅު ކައުންސިލްގެ ނުވަވަނަ ޖަލްސާ އަތޮޅުއޮފީހުގެ ޖަލްސާކުރާމާލަމުގައި ބޭއްވުނެވެ. ޖަލްސާގެ ރިޔާސަތު ބެލެހެއްޓީ ކައުންސިލްގެ ރައީސް އިބްރާހީމް އަނީސެވެ. އަތޮޅުކައުންސިލް ހުރިހައިމެމްބަރުންވެސް ޖަލްސާއަށް ޙާޟިރުވެވަޑައިގެން ތިއްބެވުމާއިއެކު ޖަލްސާ ފެށުމުގެ ގޮތުން ޖަލްސާގެ ޙާޟިރީއާއި އެޖެންޑާ އިއްވުމަށްފަހު އެޖެންޑާއަށް އިސްލާޙް ގެނައުމުގެ ފުރުޞަތު ރިޔާސަތުން ހުޅުވާލެއްވިއެވެ. އެއައްފަހު އެއްވެސް އިސްލާޙެއް ހުށަހަޅުއްވާފައި ނުވުމުން އެއްވެސް އިސްލާހަކާއިނުލާ ޖަލްސާގެ އެޖެންޑާ ފާސްކޮށް  އެޖެންޑާކުރެވިފައިވާ ކަންތައްތަކާއި މަޝްވަރާކުރެވުނެވެ. ޖަލްސާގެ ސެކްރެޓޭރިއެޓް ބެލެހެއްޓީ އ. ޕްރޮޖެކްޓް އޮފިސަރ ޙުސައިން ރަފީއުއާއި، އ.އެޑްމިނިސްޓްރޭޓިވް އޮފިސަރ މޫނިސާ ޖައުހަރީއެވެ. 9:00 ގައި ފެށުނު މިޖަލްސާ ނިމުނީ 10:25 ގައެވެ.
ޖަލްސާއަށް ހުށަހެޅުނު މައްސަލަތަކާއި ނިންމުނުގޮތް
މި ޖަލްސާއަށް އެޖެންޑާ ކުރެވިފައިވަނީ 7 މައްސަލައެވެ.

1-    ލާންޗް ބޭނުން ކުރުމުގެ ޤަވާއިދު ފާސްކުރުން.

ހައްދުންމަތީ އަތޮޅު ކައުންސިލް އިދާރާގެ ލާންޗް ކުއްޔަށް ދޫކުރުމުގައި ޢަމަލުކުރުމަށް ހަމަޖެހިފައިވާ ޤަވާއިދުގެ ޑްރާފްޓަށް އެއްވެސް އިސްލާހެއް ގެންނަންފެނޭތޯ ރިޔާސަތުން ފުރުޞަތު ހުޅުވާލުމުން މެމްބަރުންގެމެދުގައި މަޝްވަރާކުރެވި ޤަވާއިދު އެކުލަވާލި ކޮމިޓީން މެމްބަރުންގެ ސުވާލުތަކަށް ޖަވާބުދެއްވިއެވެ.

 8 ވަނަ މާއްދާގައި "ސުކޫލްގެ ޕީޓީއޭއިން ރާވައިގެންކުރާ ދަތުރުގެ އަގުން %25 ޑިސްކައުންޓް ދެވިދާނެކަމަށް ބަޔާންކޮށްފައި އޮތުމުން އެއީ ބޮޑުއަދަދެއްކަމަށް ކައުންސިލްގެ ނައިބްރައީސް ގަމު ދާއިރާގެ މެމްބަރު މުޙައްމަދު ފާއިދުވިދާޅުވުމުން ޑްރާފްޓް އެކުލަވާލިކޮމިޓީގެ ފަރާތުން ފޮނަދޫ ދާއިރާގެ މެމްބަރު ޝާހީން އިސްމާޢީލް ވިދާޅުވީ ޑިސްކައުންޓް %30 އަށްވެސް ހެދިދާނެކަމަށާއި ނަމަވެސް %30 ޑިސްކައުންޓް ދިނުމުން ދަތުރުން އެއްވެސް ފައިދާއެއް ނުވާނެތީވެ، %5 ފައިދާ ކައުންސިލަށްވާގޮތަށް %25 ޑިސްކައުންޓްގެ ގޮތުގައި ކަނޑައަޅާފައި އޮތީކަމަށެވެ.

13 ވަނަ މާއްދާގައި ބަޔާންކޮށްފައިވާ ނޯޓިކަލް މޭލަކަށް 120 ރުފިޔާ ވުމުން އަގުބޮޑުކަމަށް އިސްދޫދާއިރާގެ މެމްބަރު  އިބްރާހިމް ޙަމީދު ފާހަގަކުރެއްވުމުން ޤަވާއިދު އެކުލަވާލި ކޮމިޓީގެ ފަރާތުން ގަމު ދާއިރާގެ މެމްބަރު މުޙައްމަދު ރަޝީދު ވިދާޅުވީ އަގު ކަނޑައަޅާފައި އެވަނީ މިހާރު މިސަރަހައްދުގައި ލާންޗް ދަތުރުކޮށްދޭ ފަރާތްތަކުގެ ތެރެއިން ދެ ފަރާތެއްގެ އަގުބެލުމަށްފަހުގައި ކަމަށާއި، އެފަރާތްތަކުގެ އަގު އުޅެނީ ނޯޓިކަލް މޭލަކަށް 125 ރުފިޔާ އަދި 130 ރުފިޔާކަމަށް ވިދާޅުވިއެވެ.

ލާންޗް ކުއްޔަށް ދޫކުރުމާ ބެހޭ ޤަވާޢިދުގެ ފުރަތަމަ ބައިގެ ގޮތުގައި ތަޢާރަފެއް ހިމަނާ ލާންޗް ކުއްޔަށް ދޫކުރުމާބެހޭ ޤަވާޢިދުގެ ފުރަތަމަ ބައިގެ ނުވަތަ ތަޢާރަފްގެ ފަހަތުން މަޤުޞަދު ހިމެނުމަށް ޤަވާއިދުއެކުލަވާލި ކޮމިޓީގެ ފަރާތުން އިސްދޫ ދާއިރާގެ މެމްބަރު އިބްރާހިމް ޙަމީދު ހުށަހެޅުއްވިއެވެ.

"ތަޢާރަފް:

މިޤަވާޢިދަކީ ހައްދުންމަތީ އަތޮޅުކައުންސިލްގެ ލާންޗް ކުއްޔަށް ދޫކުރުމުގައި ޢަމަލުކުރާނެ ގޮތުގެ ޤަވާޢިދެވެ. މިޤަވާއިދު އެކުލަވާލާ ފާސްކޮށްފައި މިވަނީ 11 އޭޕްރީލް 2011 ގައި ބޭއްވި ހައްދުންމަތީ އަތޮޅު ކައުންސިލްގެ ނުވަވަނަ  ބައްދަލުމުގައެވެ. މިޤަވާޢިދަށް ކިޔާނީ "ހައްދުންމަތީ އަތޮޅު ކައުންސިލް އިދާރާގެ ލާންޗް ކުއްޔަށް ދޫކުރުމުގައި ޢަމަލު ކުރުމަށް ހަމަޖެހިފައިވާ ޤަވާޢިދު" އެވެ.

މަޤުޞަދު:

މިޤަވާޢިދުގެ މަޤުޞަދަކީ ހައްދުންމަތީ އަތޮޅު ކައުންސިލްގެ ލާންޗް އާންމު ފަރާތްތަކަށް ހަމަހަމަ އުޞޫލަކުން ލިބޭނެގޮތް ކަނޑައެޅުމާއި، އަތޮޅު ކައުންސިލްގެ މާލިއްޔަތު މުއްސަނދި ކުރުމަށާއި، ތަޢުލީމީ ދާއިރާގެ ފަރާތްތަކަށް ލުއިގޮތްތަކެއްގައި ދަތުރު ކުރެވޭނެ މަގުފަހިކޮށްދިނުމާއި، ކުއްލިޙާލަތްތަކުގައި  ފައިދާއެއް ނެގުމަކާއިނުލާ ދަތުރު ކޮއްދެވޭނެ އިންތިޒާމް  ހަމަޖައްސާ ޢަމަލު ކުރާނެ އުސޫލުތަކާއި ގޮތްތަކެއް ކަނޑައެޅުމެވެ."

މިހުށަހެޅުއްވުމަށް އިސްދޫ ދާއިރާގެ މެމްބަރު އަޙްމަދު އާސިފް ތާޢީދުކުރެއްވުމުން ޤަވާއިދަށް އިސްލާހުގެންނަންފެނޭތޯ ރިޔާސަތުން ވޯޓަށް އެއްސެވުމުން ހުރިހައި މެމްބަރުންގެ އިއްތިފާޤުން އިސްދޫ ދާއިރާގެ މެމްބަރު އިބްރާހިމް ޙަމީދު ހުށަހަޅުއްވައި އިސްދޫ ދާއިރާގެ މެމްބަރު އަޙްމަދު އާސިފް ތާޢީދުކުރެއްވިގޮތަށް ފާސްކުރެވުނެވެ.

އަށްވަނަ ބައްދަލުވުމުގައި ޤަވާއިދަށް ގެނެވުނު އިސްލާހުތަކާއިއެކު، އިސްދޫ ދާއިރާގެ މެމްބަރު އިބްރާހިމް ޙަމީދު ހުށަހަޅުއްވައި އިސްދޫ ދާއިރާގެ މެމްބަރު އަޙްމަދު އާސިފް ތާޢީދުކޮށް ފާސްކުރެވުނުގޮތަށް ޤަވާއިދު ފާސްކުރުމަށް ފެނޭތޯ ރިޔާސަތުން ވޯޓަށް އެއްސެވުމުން ހުރިހައި މެމްބަރުންގެ އިއްތިފާޤުން ޤަވާއިދު ފާސްކުރެވުނެވެ.


2-    ޓްރަސްޓްފަންޑް ހުޅުވުމާއިބެހޭގޮތުން މަޝްވަރާކުރުން.

ޖަލްސާގެ އެޖެންޑާގެ ދެވަނަ ނަންބަރުގައިވާ ޓްރަސްޓްފަންޑް ހުޅުވުމާއިބެހޭގޮތުން މަޝްވަރާކުރުން އަތޮޅުވެރިޔާގެ އެހީތެރިޔާ އަލްފާޟިލާ ޢިއްމުންނިސާގެ ޙާޟިރުގައި އެކަމާއިގުޅޭގޮތުން މަޝްވަރާކުރުމަށްޓަކައި ފަސްކުރުމަށްފަހު އެޖެންޑާގެ ނަންބަރު 3 ގައިވާ މަސައްކަތާއިގެން ޖަލްސާ ކުރިއަށް ގެންދެވިއެވެ.


3-    ކައުންސިލްގެ ފަރާތުން މީޑިއާއަށް މަޢުލޫމާތު ދެއްވާނެ ފަރާތެއް ކަނޑައެޅުން.

ސިވިލްސަރވިސް ކޮމިޝަނުން ހައްދުންމަތީ އަތޮޅު ކައުންސިލްގެ އިދާރާއަށް އެކުލަވާލާފައިވާ އޮނިގަނޑުގައި ބިއުރޯއެއްގެ މަޤާމު އޮތުމުން އެއީ މީޑިއާއަށް މަޢުލޫމާތު ދެއްވާނޭ ފަރާތް ނޫންތޯ އިސްދޫ ދާއިރާގެ މެމްބަރު އަޙްމަދު އާސިފް ސުވާލުކުރެއްވުމުން ޒިންމާދާރުވެރިޔާ މުޙައްމަދު ޖަމީލް ވިދާޅުވީ ބިއުރޯގެ މަސައްކަތަކީ ޕާސަނަލް އެސިސްޓެންޓްގެ މަސައްކަތްކަމަށާއި، އެފަރާތުގެ މަސައްކަތުގެ ތެރޭގައި މީޑިއާއި އެއްވެސް ގުޅުމެއް ނޯންނާނެކަމަށް ވިދާޅުވިއެވެ. މީޑިއާއަށް މަޢުލޫމާތު ދޭނެ ފަރާތެއްކަމަށް ދެބޭފުޅެއްގެނަން ޖަލްސާއަށް ހުށަހެޅުނެވެ. މިގޮތުން ފުރަތަމަ މާވަށު ދާއިރާގެ މެމްބަރު މުމްތާޒް ފަހުމީ ހުށަހެޅުއްވީ އިސްދޫ ދާއިރާގެ މެމްބަރު އިބްރާހީމް ޙަމީދުގެ ނަމެވެ.  މާވަށު ދާއިރާގެ މެމްބަރު މުމްތާޒް ފަހުމީ މިހުށަހެޅުއްވުމަށް އިސްދޫ ދާއިރާގެ މެމްބަރު އަޙްމަދު އާސިފް ތާޢީދުކުރެއްވިއެވެ. ދެވަނައަށް މާވަށު ދާއިރާގެ މެމްބަރު އަޙްމަދު މުޢިއްޒު ހުށަހެޅުއްވީ ގަމު ދާއިރާގެ މެމްބަރު މުޙައްމަދު ރަޝީދުގެ ނަމެވެ. ނަމަވެސް އެއްވެސް މެމްބަރަކު މާވަށު ދާއިރާގެ މެމްބަރު އަޙްމަދު މުޢިއްޒު ހުށަހެޅުއްވުމަށް ތާޢީދުކޮށްފައި ނުވާތީ، މާވަށު ދާއިރާގެ މެމްބަރު މުމްތާޒް ފަހުމީ ހުށަހަޅުއްވައި އިސްދޫ ދާއިރާގެ މެމްބަރު އަޙްމަދު އާސިފް ތާޢީދުކުރެއްވިގޮތަށް ކައުންސިލްގެ ފަރާތުން މީޑިއާއަށް މަޢުލޫމާތު ދެއްވާނެ ފަރާތެއްކަމަށް އިސްދޫ ދާއިރާގެ މެމްބަރު އިބްރާހީމް ޙަމީދުގެ ނަން ފާސްކުރުމަށް ރިޔާސަތުން ވޯޓަށް އެއްސެވުމުން 05 މެމްބަރުންނަށް ފެންނަކަމަށް ވޯޓް ދެއްވުމުން ކައުންސިލްގެ ފަރާތުން މީޑިއާއަށް މަޢުލޫމާތު ދެއްވާނެ ފަރާތަކީ އިސްދޫ ދާއިރާގެ މެމްބަރު އިބްރާހިމް ހަމީދު ކަމަށް ފާސްކުރެވުނެވެ.

•    ޖަލްސާގެ އެޖެންޑާގެ 2 ވަނަ ނަންބަރުގައިވާ ޓްރަސްޓްފަންޑް ހުޅުވުމާއިބެހޭގޮތުން މަޝްވަރާކުރުން.

ޓްރަސްޓް ފަންޑް ހުޅުވުމަށް ބޭނުންވާ ސަސަބަކީ ކޮބައިތޯ ކައުންސިލްގެ ފަރާތުން އަތޮޅުވެރިޔާގެ އެހީތެރިޔާ އިލްމުންނިސާ ކުރެން އެއްސެވުމުން ޓްރަސްޓް ފަންޑެއް ހުޅުވުމުގެ ބޭނުމާއި ސަބަބަކީ ސަރުކާރުން އެކައުންޓްތައް ފްރީޒްކޮށް އަތޮޅު ރައްޔިތުންގެ މާލިއްޔަތުގައި ހުރިފައިސާ ހިފަހައްޓަވާފައިވާތީއެވެ. އެފައިސާ ހޯދުމާއިބެހޭގޮތުން ފިނޭންސް މިނިސްޓްރީއާއި މަޝްވަރާކުރުމުން މިނިސްޓްރީން ވިދާޅުވެފައިވަނީ ޓްރަންސްޓްފަންޑެއް ހުޅުވާ އެކަމަށް އެދުމުން އެފައިސާ ދެއްވާނޭކަމަށެވެ. މީގެކުރިންވެސް އަތޮޅު ރައްޔިތުންގެ މާލިއްޔަތުގެ ގޮތުގައި 05 އެކައުންޓެއް ޓްރަސްޓް ފަންޑްގެ ގޮތުގައި ހުޅުވާފައިވާކަމަށް އަތޮޅުވެރިޔާގެ އެހީތެރިޔާ ވިދާޅުވިއެވެ. އަދި އަތޮޅުގެ މާލިއްޔަތަށް ފައިސާ ލިބެންޖެހޭ ތަންތަނުގެ ތެރެއިން ބައެއްތަންތަނުން ފައިސާ ލިބެމުންނުދާކަން އަތޮޅުވެރިޔާގެ އެހީތެރިޔާ ފާހަގަކުރެއްވިއެވެ. ޓްރަސްޓް ފަންޑްހުޅުވުމުގެ ބޭނުމާއި ބެހޭގޮތުން މެމްބަރުންނަށް ބޭނުންފުޅުވާ މަޢުލޫމާތުތަށް ލިބުމާއިގުޅިގެން ޓްރަސްޓްފަންޑް ހުޅުވުމާއިބެހޭގޮތުން ރިޔާސަތުން ވޯޓަށް އެއްސެވުމުން ހުރިހައި މެމްބަރުންގެ އިއްތިފާގުން ޓްރަސްޓް ފަންޑް ހުޅުވުމަށް ފާސްކުރެވުނެވެ.

4-    ޖަލްސާގެ އެޖެންޑާގެ 4 އަދި 6 ވަނަ ނަންބަރުގައިވާ ގުޅިފައިވާ ރަށްތަކާއި، ބިންބޮޑެތި ރަށްތަކުގައި ބަސްދަތުރު ޚިދުމަތް ދިނުމަށާއި ބެހޭގޮތުން މަޝްވަރާކުރުމާއި، ފެރީޚިދުމަތް އިތުރަށް ހަރުދަނާ ކުރުމާއި ބެހޭގޮތުން މަޝްވަރާކުރުން.

މިދެނަންބަރުގައިވާ ކަންކަމާއިބެހޭގޮތުން މެމްބަރުންގެ މެދުގައި މިކަމާއިމެދު ކުރެވިދާނެ ގިނަގުނަ ކަންކަމާއިމެދު މަޝްވަރާކުރެއްވުމަށްފަހު ނިންމެވީ ސަރުކާރުން ދޯނިސަރވިސްއާއި ދަތުރުފަތުރުގެ ކަންކަން ޙަވާލުކޮށްފައިވަނީ އެއްގަމާއި ކަނޑުގެ ދަތުރުފަތުރު ހިމެނޭގޮތަށްކަމުގައިވާތީ، ދޯނިސަރވިސްގެ އެގްރީމެންޓް ބަލާހެދުމަށްފަހު ސަރުކާރުގެ ކަމާބެހޭފަރާތްތަކަށް ހުށަހަޅުއްވައިގެން މިޚިދުމަތް ޙަރުދަނާކުރުމަށް މަސައްކަތް ކުރުމަށެވެ. އަދި މިއެގްރީމެންޓް ހޯދުމަށްޓަކައި ޓްރާންސްޕޯޓް މިނިސްޓްރީގައި ދެންނެވުމަށެވެ. 

5-    އަތޮޅުގެ އެކި ހިސާބުތަކުގައި ދަތުރުވެރިންގެ ލުއިފަސޭހައަށް ޖަހާފައިވާ ދުރަށް އަލިފޮނުވައިދޭ ބައްތިތައް ނުދިއްލޭ މައްސަލައާއި ބެހޭގޮތުން ގޮތެއް ނިންމުން.

މިކަމުގައި ކައުންސިލުން ވަކިގޮތެއް ނުނިންމޭނެކަމަށާއި، ނަމަވެސް މިކަން ސަރުކާރުގެ ސަމާލުކަމަށް ގެނައުމަށްޓަކައި ކަމާބެހޭ ވުޒާރާގައި ޓްރާސްޕޯޓް މިނިސްޓްރީގައި ސިޓީއަކުން ދެންނެވުމަށް ރިޔާސަތުން ނިންމެވިއެވެ.

6-    އެޖެންޑާގެ 7 ވަނަ ނަންބަރުގައިވާ އަތޮޅު ކައުންސިލްގެ 8 ވަނަ ޖަލްސާގެ ޔައުމިއްޔާ ފާސްކުރުން.

ޔައުމިއްޔާއަށް އެއްވެސް އިސްލާހެއް ގެންނަންފެނޭތޯ ރިޔާސަތުން އެއްސެވުމުން އެއްވެސް އިސްލާހެއް ހުށަނޭޅި ހާޟިރުވެތިބި މެންބަރުންގެ އިއްތިފާގުން ޔައުމިއްޔާ ފާސްކުރެވުނެވެ.

މަޢުލޫމާތު ހިއްސާކުރެވުނު ކަންތައްތައް:

1-    ކީރިތިޤުރުއާނުގެ ދިވެހިތަރުޖަމާ ބޭނުންފުޅުވާ ފަރާތްތަކަށް ތަރުޖަމާ ބެހުމަށްޓަކައި އިސްލާހުކުރެވިފައިވާ ކަރުދާސްކޮޅުތައް ހޯދުމަށްފަހު ކޮންމެރަށަކަށްވެސް އެރަށެއްގެ ގޭބީސީއަކަށް ތަރުޖަމާއެއްގެ ނިސްބަތުން ފޮނުވާ ބާކީބައި ސްކޫލްތަކަށާއި، މިސްކިތްތަކަށް ލުމަށް މެމްބަރުންގެ މެދުގައި މަޝްވަރާކުރެވުނެވެ.

2-    އަތޮޅު ޤުރުޢާން މުބާރާތް ބޭއްވުމަށްޓަކައި އެއްވެސް ފަރާތަކުން ޝަޢުގުވެރިކަން ފާޅުކޮށްފައިނުވާތީ، އެމުބާރާތް ލ. އަތޮޅު ތަޢުލީމީ މަރުކަޒުގައި ބޭއްވުމަށް ނިންމަވާ އެކަމަށް ސުކޫލުގައި އެދިފައިވާނޭކަމަށް ކައުންސިލްގެ ރައީސް ވިދާޅުވިއެވެ. އަދި މިކަން އެންމެ އިސްކޮށް ވިލަރެސް ކުރައްވާނީ އިސްދޫ ދާއިރާގެ މެމްބަރު އަދި އިސްލާމިކް އެފެއާޒްގެ ކަންތައްތަކާއި ޙަވާލުވެވަޑައިގެންނެވި އިބްރާހިމް ހަމީދުކަމަށްވެސް ރިޔާސަތުން ވިދާޅުވެލެއްވިއެވެ.

3-    ރަށްރަށުގެ ރަށުކައުންސިލްތަކަށް "ދިވެހިރާއްޖޭގެ އިދާރީ ދާއިރާތައް ލާމަރުކަޒީ އުޞޫލުން ހިންގުމުގެ ޤާނޫނު"އާއި އެއްގޮތަށް މަސައްކަތްތައް ކުރުމަށް އެންގުމަށް މެމްބަރުން މަޝްވާރކުރެއްވިއެވެ.



                                           އިބްރާހީމް އަނީސް
                                            ކައުންސިލްގެ ރައީސް

  ޖަލްސާގައި ބައިވެރިވެ ވަޑައިގެންނެވި މެމްބަރުން


•    ގަމުދާއިރާގެ މެމްބަރ      އަލްފާޟިލް މުޙައްމަދު ފާއިދު (ނައިބްރައީސް)    •   

•    މާވަށު ދާއިރާގެ މެމްބަރ    އަލްފާޟިލް މުމްތާޒު ފަހުމީ    •   

•    ފޮނަދޫ ދާއިރާގެ މެމްބަރ    އަލްފާޟިލް ޝާހީން އިސްމާޢީލް    •   

•    މާވަށު ދާއިރާގެ މެމްބަރ    އަލްފާޟިލް އަޙުމަދު މުއިއްޒު    •   

•    ގަމުދާއިރާގެ މެމްބަރ      އަލްފާޟިލް މުޙައްމަދު ރަޝީދު    •   

އިސްދޫދާއިރާގެ މެމްބަރ    އަލްފާޟިލް އިބްރާހިމް ހަމީދު    •   

އިސްދޫދާއިރާގެ މެމްބަރ    އަލްފާޟިލް އަޙްމަދު އާޞިފް    •   

އިސްދު އާއި ކަލައިދޫގެ ކައުންސިލް އިންތިހާބު އަލުން އިއުލާން ކުރާނެ: އިލެކްޝަންސް

ލ. އިސްދޫގެ ދެ އަވަށް ކަމުގައިވާ އިސްދު އާއި ކަލައިދޫ ވަކި ދެ ރަށެއްގެ ގޮތުގައި ހަމަޖެއްސުމުން، އެ ދެ ރަށުގެ ކައުންސިލަށް ވާދަކުރުމުގެ ފުރުސަތު އަލުން ހުޅުވާލާނެ ކަމަށް އިލެކްޝަންސް ކޮމިޝަނުން މިއަދު ބުނެފި އެވެ.

އެ ކޮމިޝަންގެ މެމްބަރު އަލީ މުހައްމަދު މަނިކު "ހަވީރަ"ށް ވިދާޅުވީ ލާމަރުކަޒީ ގާނޫނުގައި ބުނެފައިވާ ގޮތުން މީހުން ދިރިއުޅޭ ރަށްތައް ކަނޑައެޅުމަކީ ރައީސުލްޖުމްހޫރިއްޔާ އަށް ލިބިގެންވާ ބާރަކަށް ވާތީ، ރަށެއް އުފައްދައިފި ނަމަ އެ ރަށެއްގެ ކައުންސިލް އިންތިހާބު ބާއްވަން ޖެހޭނެ ކަމަށެވެ.

އިސްދު އާއި ކަލައިދޫ، ދެ ރަށެއްގެ ގޮތުގައި ހަމަޖެއްސީ ޖެނުއަރީ 18ގައި ބާއްވާ ކައުންސިލްތަކުގެ އިންތިހާބަށް ކުރިމަތިލުމުގެ ފުރުސަތު ހުޅުވާލާފައިވަނިކޮށެވެ. އެހެންވެ އެ ދެ ރަށުގެ ކައުންސިލަށް ކުރިމަތިލުމުގެ ފުރުސަތު ހުޅުވާލުމާ ބެހޭ ގޮތުން ކޮމިޝަންގައި މިއަދު މަޝްވަރާކުރާނެ ކަމަށް މަނިކު ވިދާޅުވި އެވެ.

ކުރިން އެއީ ދެ އަވަށެވެ. އެހެންކަމުން ކައުންސިލް އިންތިޚާބުކޮށްފައި ވަނީ އެއް ރަށެއްގެ ގޮތުގައި ބަލައިގެންނެވެ.

"މިހާރު ކައުންސިލު އިންތިހާބަށް ކުރިމަތިލުމުގެ ފުރުސަތު މި މަހު އަށަކަށް ހަމަވާނެ. ނަމަވެސް އިސްދޫ އަދި ކަލައިދޫ ކައުންސިލަށް ކުރިމަތިލުމުގެ ފުރުސަތު އެއަށް ވުރެ އިތުރުކުރަން ޖެހޭނެ،" މަނިކު ވިދާޅުވި އެވެ.

ކައުންސިލްތައް 2011 ގައި އުފެއްދުމުގެ ކުރިން އިސްދު އާއި ކަލައިދޫ އަވަށުގައި ދެ އޮފީސް ހުރެ އެވެ. ނަމަވެސް އޭގެ ފަހުން އެ ރަށުގެ ދެ އަވަށް އެއްކޮށްލައި އެއް ކައުންސިލެއްގެ ދަށުން ދެ އަވަށް ހިންގަން ފެށި އެވެ.

ލ. އިސްދޫގެ ދެ އަވަށް ވަކި ދެ ރަށެއްގެ ގޮތުގައި ހަމަޖައްސައިފި

    ލ. އިސްދޫގެ ދެ އަވަށް ކަމުގައިވަ އިސްދޫ އަވަށާއި ކަލައިދޫ އަވަށަކީ ވަކި ދެ ރަށެއްގެ ގޮތުގައި ރައީސް އަބްދުﷲ ޔާމީން މިއަދު ކަނޑައަޅުއްވައިފި އެވެ.

ރައީސް އޮފީހުން ބުނި ގޮތުގައި ރައީސް މިގޮތަށް ކަނޑައެޅުއްވީ ދިވެހިރާއްޖޭގެ އިދާރީ ދާއިރާތައް ލާމަރުކަޒީ އުސޫލުން ހިންގުމުގެ ޤާނޫނުގެ ދަށުން 14 އޮކްޓޫބަރު 2010 ގައި ދިވެހި ސަރުކާރުގެ ގެޒެޓުގައި ޝާއިޢުކޮށްފައިވާ ދިވެހިރާއްޖޭގައި މީހުން ދިރިއުޅޭ ރަށްތައް ކަނޑައެޅުމުގެ ލިސްޓަށް، ރައީސުލްޖުމްހޫރިއްޔާގެ ގަރާރަށް ގެންނެވި އިސްލާހަކުންނެވެ.

ކައުންސިލްތައް 2011 ގައި އުފެއްދުމުގެ ކުރިން އިސްދޫ އާއި ކަލައިދޫ އަވަށުގައި ދެ އޮފީސް ހުރެ އެވެ. ނަމަވެސް އޭގެ ފަހުން އެ ރަށުގެ ދެ އަވަށް އެއްކޮށްލައި އެއް ކައުންސިލެއްގެ ދަށުން ދެ އަވަށް ހިންގަން ފެށި އެވެ.
އިސްދޫގައި ގާތްގަނޑަކަށް 1،800 މީހުން ދިރިއުޅޭއިރު، ކަލައިދޫގައި ދިރިއުޅެނީ 1،000 މީހުންނެވެ.

ލ. އަތޮޅު ކައުންސިލްގެ ޔައުމިއްޔާ 8

`
ހައްދުންމަތީ އަތޮޅު ކައުންސިލްގެ އިދާރާ
           ފޮނަދޫ
         ދިވެހިރާއްޖެ. 



04 އޭޕްރީލް 2011 ގައިބޭއްވުނު އަތޮޅުކައުންސިލްގެ އަށްވަނަ ޖަލްސާގެ ޔައުމިއްޔާ


2011 އޭޕްރީލް 04 ވަނަދުވަހު ހެނދުނު 09:00 ގައި އަތޮޅު ކައުންސިލްގެ އަށްވަނަ ޖަލްސާ އަތޮޅުއޮފީހުގެ ޖަލްސާކުރާމާލަމުގައި ބޭއްވުނެވެ. ޖަލްސާގެ ރިޔާސަތު ބެލެހެއްޓީ ކައުންސިލްގެ ރައީސް އިބްރާހީމް އަނީސެވެ. އަތޮޅުކައުންސިލް ހުރިހައިމެމްބަރުންވެސް ޖަލްސާއަށް ޙާޟިރުވެވަޑައިގެން ތިއްބެވުމާއިއެކު ޖަލްސާ ފެށުމުގެ ގޮތުން ޖަލްސާގެ ޙާޟިރީއާއި އެޖެންޑާ މެމްބަރުންނަށް އިއްވުމަށްފަހު އެއްވެސް އިސްލާހަކާއިނުލާ ޖަލްސާގެ އެޖެންޑާ ފާސްކޮށް  އެޖެންޑާކުރެވިފައިވާ ކަންތައްތަކާއި މަޝްވަރާކުރެވުނެވެ. ޖަލްސާގެ ސެކްރެޓޭރިއެޓް ބެލެހެއްޓީ އ. ޕްރޮޖެކްޓް އޮފިސަރ ޙުސައިން ރަފީއުއާއި، އ.އެޑްމިނިސްޓްރޭޓިވް އޮފިސަރ މޫނިސާ ޖައުހަރީއެވެ. 9:00 ގައި ފެށުނު މިޖަލްސާ ނިމުނީ 10:32 ގައެވެ.
ޖަލްސާއަށް ހުށަހެޅުނު މައްސަލަތަކާއި ނިންމުނުގޮތް
މި ޖަލްސާއަށް އެޖެންޑާ ކުރެވިފައިވަނީ 5 މައްސަލައެވެ.

1-    ލާންޗް ބޭނުން ކުރުމުގެ ޤަވާއިދު ފާސްކުރުން.

ހައްދުންމަތީ އަތޮޅު ކައުންސިލް އިދާރާގެ ލާންޗް ކުއްޔަށް ދޫކުރުމުގައި ޢަމަލުކުރުމަށް ހަމަޖެހިފައިވާ ޤަވާއިދުގެ ޑްރާފްޓަށް އިސްލާހެއް ގެންނަންފެނޭތޯ ރިޔާސަތުން އެއްސެވުމުން އެޑްރާފްޓަށް ތިރީގައި މިވާގޮތުގެ މަތިން އިސްލާހުތައް ހުށަހެޅިގެން ދިޔައެވެ.

ޤަވާއިދުގައި ޚިދުމަތް ހޯއްދަވާ ފަރާތްތަކުން ނަގާނެ އަގުތައް ކަނޑައެޅިފައި ނެތްކަމަށް ކައުންސިލްގެ އިސްދޫ ދާއިރާގެ މެމްބަރު އަޙްމަދު އާސިފް ވިދާޅުވުމުން، މިޤަވާއިދު އެކުލަވާލި ކޮމިޓީން އަގުތައް ކަނޑައަޅަން ނިންމަވާފައިވަނީ ކައުންސިލްގެ ޖަލްސާއެއްގައި އެންމެހައި މެމްބަރުން މަޝްވަރާކުރުމަށްފަހުގައި ކަމަށް ކޮމިޓީގެ މެމްބަރުންނަށް ވެނިވަޑައިގަންނަވާތީ އެކަން އެގޮތަށް ކުރައްވާފައިވަނީކަމަށް ރިޔާސަތުން ވިދާޅުވިއެވެ.

"ލ. އަތޮޅު ކައުންސިލްގެ އިދާރާގެ ލާންޗް ކުއްޔަށް ދޫކުރާފަރާތުން ޢަމަލުކުރަންޖެހޭ ގޮތުގެ ޤަވާއިދު"ގެ 08 ވަނަ ނަންބަރުގެ ފަހަތަށް 09 ވަނަ ނަންބަރުގެ ގޮތުގައި "ލާންޗް މަރާމާތުކުރަންޖެހޭ ޙާލަތްތަކުގައި މަރާމާތުކުރުމުގެ މަސައްކަތް މާލިއްޔަތު ޤަވާއިދާއި އެއްގޮތްވާގޮތުގެމަތިން ކުރިއަށްގެންދިޔުން" އަދި 10 ވަނަ ނަންބަރުގެ ގޮތުގައި "ތެޔޮބަދަލުކުރުމުގެ ކަންތައް އިންޖީނުގެ އޮޕަރޭޓިންގ މެނިއުލްގައިވާ ގޮތުގެމަތިން ޤަވާއިދުންކުރުން" އިތުރުކޮށް ޑްރާފްޓްކުރެވުނު ޤަވާއިދުގެ 09 ވަނަ ނަންބަރުގައިވާ "މިޤަވާއިދުގައި ހިމެނިފައިނުވާ ކަމެއް ދިމާވެއްޖެނަމަ އެކަމެއް ކައުންސިލުންގެ މަޝްވަރާގެމަތިން ހައްލުކުރަން މަސައްކަތް ކުރަންވާނެއެވެ" ޤަވާއިދުގެ 11 ވަނަ ނަންބަރަށް ބަދަލުކުރުމަށް ރިޔާސަތުން ހުށަހަޅުއްވައި ފޮނަދޫ ދާއިރާގެ މެމްބަރު ޝާހީން އިސްމާއީލް ތާޢީދުކުރައްވައި ވޯޓަށް އެއްސެވުމުން ކައުންސިލްގެ އިއްތިފާޤުން އެ ދެ މާއްދާ އިތުރުކުރުމަށް ފާސްކުރެވުނެވެ.

"ލާންޗްގައި ކުލީދަތުރުކުރާނީ އެކަމަށް ޙަވާލުވެހުންނަ އިދާރީ މުވައްޒަފު ތައްޔާރުކޮށް ލާންޗް ކެޕްޓަނާއި ޙަވާލުކުރެވޭ ދަތުރު ސްލިޕްގައިވާ ގޮތުގެމަތިންނެވެ. ދަތުރުމަތީގައި އުޅެމުން ދަތުރު ރީރޫޓް ކުރުމަށް (ދަތުރުގެ މަންޒިލް ބަދަލުކުރުމަށް) ދަތުރު ކުރާ ފަރާތުން އެދިފިނަމަ އެކަން ކުރާނީ ލާންޗް ކެޕްޓަން އިދާރީ މުވައްޒަފާއި ވާހަކަ ދެއްކުމުން އިދާރީ މުވައްޒަފު އަންގާ ގޮތުގެ މަތީންނެވެ" މިމާއްދާގައި "ދަތުރު ރީރޫޓް ކުރުމަށް" އޮތް އޮތުން އުނިކުރުމަށް ކައުންސިލްގެ އިސްދޫ ދާއިރާގެ މެމްބަރު އަޙްމަދު އާސިފް ހުށަހަޅުއްވައި،  އިސްދޫ ދާއިރާގެ މެމްބަރު އިބްރާހިމް ހަމީދު ތާއީދުކުރެއްވުމުން، ރިޔާސަތުން ވޯޓަށް އައްސަވައި 04 ވޯޓުން އެމާއްދާ "ލާންޗްގައި ކުލީދަތުރުކުރާނީ އެކަމަށް ޙަވާލުވެހުންނަ އިދާރީ މުވައްޒަފު ތައްޔާރުކޮށް ލާންޗް ކެޕްޓަނާއި ޙަވާލުކުރެވޭ ދަތުރު ސްލިޕްގައިވާ ގޮތުގެމަތިންނެވެ. ދަތުރުމަތީގައި އުޅެމުން ދަތުރު މަންޒިލް ބަދަލުކުރުމަށް ދަތުރު ކުރާ ފަރާތުން އެދިފިނަމަ އެކަން ކުރާނީ ލާންޗް ކެޕްޓަން އިދާރީ މުވައްޒަފާއި ވާހަކަ ދެއްކުމުން އިދާރީ މުވައްޒަފު އަންގާ ގޮތުގެ މަތީންނެވެ" މިގޮތަށް ފާސްކުރެވުނެވެ.

"ލ. އަތޮޅު ކައުންސިލްގެ އިދާރާގެ ލާންޗް ކުއްޔަށް ދޫކުރާފަރާތުން ޢަމަލުކުރަންޖެހޭ ގޮތުގެ ޤަވާއިދު"ގެ 03 ވަނަ މާއްދާގައިވާ "ލާންޗަށް ބޭނުންވާ އެންމެހައި ތަކެތި ހޯދަންވާނީ މާލިއްޔަތު ޤަވާއިދާއި ޚިލާފު ނުވާގޮތަށް ލިޔެކިޔުން ފުރިހަމަ ކުރެވިގެންނެވެ. މިގޮތުންވެސް ދަތުރުކުރާންވާނީ ޓްރާންސްޕޯޓްގެ ޤަވާއިދާއި އެއްގޮތަށެވެ." މިމާއްދާގައިވާ މިގޮތުންވެސް ދަތުރުކުރާންވާނީ ޓްރާންސްޕޯޓްގެ ޤަވާއިދާއި އެއްގޮތަށްކަމަށް އޮތްބައި ވަކި މާއްދާއެއްގެ ގޮތުގައި ގެންނަން ފެންނަކަމަށް ކައުންސިލްގެ ނައިބްރައީސް މުޙައްމަދު ފާއިދު ހުށަހެޅުއްވުމުން ކައުންސިލްގެ މެމްބަރުންގެ މެދުގައި މަޝްވަރާކުރެވި އެޕޮއިންޓަކީ 04 މާއްދާގެ ފަހަތަށް އޮންނަންޖެހޭބައިކަމަށާއި އެއީ ޤަވާއިދު ޑްރާފްޓްކުރެވުނުއިރު ލިޔެވިފައިވާ ލިޔުމުގެ ކުށެއްކަމުގައި ވާތީ، 04 ވަނަ މާއްދާ އޮންނަންޖެހޭނެގޮތަކީ "ލާންޗް ދަތުރުކުރަންވާނީ ސަލާމަތީގޮތުން ލާންޗްގައި ހުންނަންޖެހޭ އެންމެހައި ތަކެތި ފުރިހަމައަށް ލާންޗްގައި ހުރެގެންނެވެ. މިގޮތުންވެސް ދަތުރުކުރަންވާނީ ޓްރާންސްޕޯޓް ޤަވާއިދާއި އެއްގޮތަށެވެ." މިގޮތަށްކަމުގައި ނިންމެވިއެވެ.

"ލ. އަތޮޅު ކައުންސިލްގެ އިދާރާގެ ލާންޗް ކުއްޔަށް ދޫކުރާފަރާތުން ޢަމަލުކުރަންޖެހޭ ގޮތުގެ ޤަވާއިދު"ގެ 01 ވަނަ މާއްދާ "ލާންޗް ކުއްޔަށްހިފަން އެދުމުން ދަތުރުގެ އަގުދޭންވާނީ ފަޅުވެރިންނާއި، ލާންޗް އޮތީ ދަތުރުކުރެވޭ ޙާލަތުގައިތޯ ބަލާ ޗެކް ކުރުމަށްފަހުގައެވެ." މިމާއްދާގައިވާ އަގު ދޭންވާނީ ބަދަލުކުރުމަށްފެންނަކަމަށާއި، ކުއްޔަށް ދޫކުރާ ފަރާތުން އަގުދޭންނުޖެހޭނެތީ އެއިބާރާތް ބަދަލުކުރުމަށް އިސްދޫ ދާއިރާގެ މެމްބަރު އިބްރާހިމް ހަމީދު ހުށަހެޅުއްވުމުން، ގަމު ދާއިރާގެ މެމްބަރު މުޙައްމަދު ރަޝީދު ވިދާޅުވީ އެމާއްދާ ބަދަލުކުރަން ނުފެންނަކަމަށާއި "ހައްދުންމަތީ އަތޮޅު ކައުންސިލް އިދާރާގެ ލާންޗް ކުއްޔަށް ދޫކުރުމުގައި ޢަމަލުކުރުމަށް ހަމަޖެހިފައިވާ ޤަވާއިދު"ގެ 04 ވަނަ މާއްދާއާއި ޙަވާލާދިނުމުން ފުދޭނެކަމުގައެވެ. މިކަމަށް މެމްބަރުންގެ މެދުގައި މަޝްވަރާކުރެއްވުމަށްފަހު ނިންމެވީ ލާންޗް ކުއްޔަށް ދޫކުރާފަރާތުން ޢަމަލުކުރަންޖެހޭ ގޮތުގެ ޤަވާއިދުގެ 01 ވަނަ ނަންބަރު " ލާންޗް ކުއްޔަށްހިފަން އެދުމުން ދަތުރުގެ އަގުދޭންވާނީ ފަޅުވެރިންނާއި، ލާންޗް އޮތީ ދަތުރުކުރެވޭ ޙާލަތުގައިތޯ ބަލާ ޗެކް ކުރުމަށްފަހު ލާންޗް ކުއްޔަށް ދޫކުރުމުގައި ޢަމަލުކުރުމުގެ ޤަވާއިދުގެ 04 ވަނަ މާއްދާގައިވާ ގޮތުގެމަތިންނެވެ." އަދި މިމާއްދާ މިގޮތަށް ބޭއްވުމާއިމެދު ރިޔާސަތުން  ވޯޓަށް އެއްސެވުމުން ކައުންސިލް މެމްބަރުންގެ އިއްތިފާޤުން އެމާއްދާ އެގޮތަށް ފާސްކުރެވުނެވެ.

"ހައްދުންމަތީ އަތޮޅު ކައުންސިލް އިދާރާގެ ލާންޗް ކުއްޔަށް ދޫކުރުމުގައި ޢަމަލުކުރުމަށް ހަމަޖެހިފައިވާ ޤަވާއިދު"ގެ 05 ވަނަ މާއްދާގައި "އަމިއްލަ ފަރުދުންނާއި، އަމިއްލަ ކުންފުނިތަކަށް، ދަތުރުކޮށްދެވޭނީ ދަތުރުގެ އަގަށްވާ ފައިސާ  ދަތުރުކުރުމުގެ ކުރިން ދެއްކުމަށްފަހުގައެވެ. މިގޮތަށް ދައްކާފައިސާ ބަލައިގެނެވޭނީ ކައުންސިލް އިދާރާގެ ލެޓަރހެޑްގައި ހެދިފައިވާ ބިލަކަށެވެ." މިމާއްދާގައި މިހެން ބަޔާންކުރެވި ޤަވާއިދުގެ 17 މާއްދާގައި "މިޤަވާއިދުގައި ހިމެނިފައިނުވާ ކަމެއްދިމާވެއްޖެނަމަ އެކަމެއް ނިންމާނީ ދަތުރުކުރި ފަރާތާއި މިކައުންސިލުން ވާހަކަދައްކައިގެންނެވެ. މިގޮތުންވެސް އެމައްސަލައެއް ހައްލުނުވެއްޖެނަމަ އެކަމެއް ހައްލުކުރާނީ ޝަރީޢަތް މެދުވެރިކޮށެވެ." މިގޮތަށް ޤަވާއިދުގައި އޮތުމުން މައްސަލައެއްދިމާވާ ކޮންމެ ފަހަރެއްގައި ކައުންސިލްގެ މެމްބަރުން ބައްދަލުކޮށް ގޮތް ނިންމުމަކީ ވަރަށް ދަތިވާނެ ކަމެއްކަމުގައިވާތީ، 05 ވަނަ މާއްދާއަށް ބަދަލެއްގެނައުމަށް ފެންނަކަމުގައި ގަމު ދާއިރާގެ މެމްބަރު މުޙައްމަދު ރަޝީދު ހުށަހަޅުއްވައި މާވަށު ދާއިރާގެ އަޙްމަދު މުޢިއްޒު ތާޢީދުކުރެއްވުމުން މިކަމުގައި މެމްބަރުންގެ މެދުގައި މަޝްވަރާކުރުމަށްފަހު 05 ވަނަ މާއްދާއަށް އަންނަނިވިގޮތަށް އިސްލާހުގެނައުމަށް ހުށަހެޅުނެވެ. "އަމިއްލަ ފަރުދުންނާއި، އަމިއްލަ ކުންފުނިތަކަށް، ދަތުރުކޮށްދެވޭނީ ދަތުރުގެ އަގަށްވާ ފައިސާ  ދަތުރުކުރުމުގެ ކުރިން ދެއްކުމަށްފަހުގައެވެ. މިގޮތަށް ދައްކާފައިސާ ބަލައިގެނެވޭނީ ކައުންސިލް އިދާރާގެ ލެޓަރހެޑްގައި ހެދިފައިވާ ބިލަކަށެވެ. ފައިސާ ބަލައިގަތުމަށްފަހު ކުރެވޭ ދަތުރުގައި ލާންޗަށް ގެއްލުމެއް ލިބި ދަތުރު ކުރިއަށްގެންދެވޭގޮތް ނުވެއްޖެހާލަތެއްގައި ދަތުރުގެ ބާކީބައި ފުރިހަމަކުރެވޭނެގޮތް ހަމަޖައްސައިދޭންވާނެއެވެ." މިމާއްދާ މިގޮތަށް ފާސްކުރުމަށް ފެނޭތޯ ރިޔާސަތުން ވޯޓަށް އެއްސެވުމުން 06 މެމްބަރުންނަށް ފެންނަކަމަށް ވޯޓްދެއްވުމުން 05 ވަނަ މާއްދާ އެގޮތަށް އިސްލާހުކުރުމަށް ފާސްކުރެވުނެވެ.

"ލ. އަތޮޅު ކައުންސިލްގެ އިދާރާގެ ލާންޗް ކުއްޔަށް ދޫކުރާފަރާތުން ޢަމަލުކުރަންޖެހޭ ގޮތުގެ ޤަވާއިދު" އަދި " ހައްދުންމަތީ އަތޮޅު ކައުންސިލް އިދާރާގެ ލާންޗް ކުއްޔަށް ދޫކުރުމުގައި ޢަމަލުކުރުމަށް ހަމަޖެހިފައިވާ ޤަވާއިދު" މިގޮތަށް އޮތުމުން އެއްމާނައެއް ދޭހަވާކަމަށް އިސްދޫ ދާއިރާގެ މެމްބަރު އަޙްމަދު އާސިފް ހުށަހަޅުއްވައި ގަމު ދާއިރާގެ މެމްބަރު މުޙައްމަދު ރަޝީދު ތާޢީދުކުރެއްވުމުން މެމްބަރުންގެ މެދުގައި މަޝްވަރާކުރުމަށްފަހު "ލ. އަތޮޅު ކައުންސިލްގެ އިދާރާގެ ލާންޗް ކުއްޔަށް ދޫކުރާފަރާތުން ޢަމަލުކުރަންޖެހޭ ގޮތުގެ ޤަވާއިދު" މިދަންނަވާގޮތަށް އިސްލާހުކުރުމަށް ހުށަހެޅުނެވެ. "ހައްދުންމަތީ އަތޮޅު ކައުންސިލް އިދާރާގެ ލާންޗް ކުއްޔަށްދޫކުރާފަރާތުން ޢަމަލުކުރަންޖެހޭ ގޮތުގެ ޤަވާއިދު". ހުށަހެޅުނުގޮތަށް ރިޔާސަތުން ވޯޓަށް އެއްސެވުމުން 06 މެމްބަރުންނަށް ފެންނަކަމަށް ވޯޓްދެއްވުމުން އެގޮތަށް އިސްލާހުކުރުމަށް ފާސްކުރެވުނެވެ.

"ހައްދުންމަތީ އަތޮޅު ކައުންސިލް އިދާރާގެ ލާންޗް ކުއްޔަށް ދޫކުރުމުގައި ޢަމަލުކުރުމަށް ހަމަޖެހިފައިވާ ޤަވާއިދު" ގެ 08 ވަނަ މާއްދާގައި ސުކޫލުތަކުގެ ޕީ.ޓީ.އޭ އިން ރާވައިގެން ކުރާ ދަތުރުގެ އަގުން ޑިސްކައުންޓް ދޭއިރު ސަރުކާރުގެ ތަންތަނަށްވެސް ޑިސްކައުންޓް ދިނުމަށް ފެންނަކަމަށް މާވަށު ދާއިރާގެ މެމްބަރު މުމްތާޒް ފަޙުމީ ހުށަހެޅުއްވުމުން ގަމު ދާއިރާގެ މެމްބަރު މުޙައްމަދު ރަޝީދު ވިދާޅުވީ އެގޮތަށް ޑިސްކައުންޓް ދޭކަމުގައިވާނަމަ ގިނަ ދަތުރުތަކެއް އަމިއްލަ ފަރާތްތަކާއި، އަމިއްލަ ކުންފުނިތަކުން އަދި ސަރުކާރުގެ ތަންތަނުންވެސް ލިބެމުންދާނެކަމަށާއި، ނަމަވެސް މިކަމަކީ ލާންޗް ސެކްޝަން ހަދައިގެން މިސަރަހައްދަށްލިބޭ ހުރިހައިދަތުރުތަކެއް ނެގުމުގެ ބޭނުމުގައި ކުރާކަމެއް ނޫންކަމަށާއި، ސަރުކާރުގެ ތަންތަނަށް ޑިސްކައުންޓް ދިނުމަށް ނުފެންނަކަމަށެވެ. އަދި މިގޮތަށް ޑިސްކައުންޓް ދޭނަމަ ޚިދުމަތް ލިބިގަންނަ ފަރާތްތަކުން ޑިސްކައުންޓެއްގެ ގޮތުގައި މަދުވެގެން %05 ދިނުމުންވެސް ދަތުރުން ކުރާނެ މާބޮޑު ފައިދާއެއްނެތްކަމުގައި ގަމު ދާއިރާގެ މެމްބަރު މުޙައްމަދު ރަޝީދު ވިދާޅުވިއެވެ. ނަމަވެސް ޑިސްކައުންޓްދިނުމުގައި 10,000.00ރ (ދިހަ ހާސް ރުފިޔާ) އަށްވުރެ ބޮޑެތި ދަތުރުތަކުގައި ޑިސްކައުންޓެއް ދިނުމަށް ފެންނަކަމުގައި ގަމު ދާއިރާގެ މެމްބަރު މުޙައްމަދު ރަޝީދު ވިދާޅުވުމުން މާވަށު ދަޢިރާގެ މެމްބަރު މުމްތާޒް ފަޙުމީ ތާޢީދުކުރެއްވިނަމަވެސް މި މައްސަލައިގައި ރިޔާސަތުން ވޯޓަށް އައްސަވައިފައެއް ނުވެއެވެ.

"ލ. އަތޮޅު ކައުންސިލްގެ އިދާރާގެ ލާންޗް ކުއްޔަށް ދޫކުރާފަރާތުން ޢަމަލުކުރަންޖެހޭ ގޮތުގެ ޤަވާއިދު" އަދި " ހައްދުންމަތީ އަތޮޅު ކައުންސިލް އިދާރާގެ ލާންޗް ކުއްޔަށް ދޫކުރުމުގައި ޢަމަލުކުރުމަށް ހަމަޖެހިފައިވާ ޤަވާއިދު" ފާސްކުރުމުގެ ކުރިން ލާންޗްގެ ކަންތައް ބެލެހެއްޓި މި އިދާރާގެމުވައްޒަފުންނާއި ބައްދަލުކޮށް އެބޭފުޅުންގެ ޙިޔާލުހޯއްދެވުމަށްފަހު ފާސްކުރެއްވުމަށް ފެންނަކަމަށް ފޮނަދޫ ދާއިރާގެ މެމްބަރު ޝާހީން އިސްމާޢީލް ހުށަހެޅުއްވުމުން މާވަށު ދާއިރާގެ މެމްބަރު މުމްތާޒް ފަހުމީ އަދި އިސްދޫ ދާއިރާގެ މެމްބަރު އިބްރާހިމް ހަމީދު އެހުށަހެޅުމަށް ތާޢީދުކުރެއްވުމުން، ފޮނަދޫ ދާއިރާގެ މެމްބަރު ޝާޙިން އިސްމާޢީލް ހުށަހެޅުއްވިގޮތަށް ރިޔާސަތުން ވޯޓަށް އައްސަވައި 05 މެމްބަރުންނަށް ފެންނަކަމަށް ވޯޓްދެއްވުމުން ލާންޗްގެ ދަތުރުތައް މީގެ ކުރިން ބެލެހެއްޓެވި  މުވައްޒަފުންނާއި ބައްދަލުކޮށް އެބޭފުޅުން ޙިޔާލުހޯއްދެވުމަށްފަހު ޤަވާއިދު ފާސްކުރުމަށް ފަސްކުރެވުނެވެ. އަދި އަގުތައް ކަނޑައެޅުމަށްޓަކައި މެމްބަރުންގެ މެދުގައި މަޝްވަރާކުރުމަށްފަހު ނިންމެވީ ޤަވާއިދު އެކުލަވާލިކޮމިޓީން މިހާރުގެ އަގުތައް ދިރާސާކުރުމަށްފަހު ރިޕޯޓާއިއެކު ޖަލްސާއަށް ހުށަހެޅުމަށެވެ.


2-    އިދާރާގެ  މަސައްކަތާއި، މެމްބަރުން  މަސްޢޫލުވާނެ  ދާއިރާތައް ކަނޑައެޅުން.
   

މެމްބަރުން މަސްޢޫލުވާނެ ދާއިރާތައް ކަނޑައެޅުމަށްޓަކައި ކައުންސިލްގެ އިދާރާއިން ސަރުކާރުގެ ވުޒާރާތަކާގުޅިގެން ކުރާމުންގެންދާ މަސައްކަތްތަކާއި، އަދި ކައުންސިލްގެ އިދާރާއިން ކުރަމުންގެންދާ މަސައްކަތްތައް 7 ބަޔަށް ބަހާލާ ކައުންސިލްގެ ރައީސް ތައްޔާރުކުރައްވާފައިވާ ކަރުދާހަށް މެމްބަރުންނަށް އިސްލާހެއް ގެނަންފެނޭތޯ ރިޔާސަތުން އައްސަވައި އިސްލާހެއް އޮތްކަމުގައިވާނަމަ ހުށަހެޅުއްވުމަށް ހުޅުވާލި ފުރުޞަތުގައި އެއްވެސް އިސްލާހެއް އެއްވެސް މެމްބަރަކު ހުށަހަޅުއްވާފައިނުވާތީ ދާއިރާތަކަށް މެމްބަރުން ކަނޑައެޅުމަށް ރިޔާސަތުން ނިންމެވިއެވެ.

ހުށަހެޅިފައިވާ ކަރުދާހުގެ 06 ވަނަ ނަންބަރުގައިވާ މިނިސްޓްރީ އޮފް ފިނޭންސާއި، އިލެކްޝަންސް ކޮމިޝަންގެ މަސައްކަތްތައް ކައުންސިލްގެ ނައިބްރައީސް މުޙައްމަދު ފާއިދުއާއި ޙަވާލުކުރުމަށް ކައުންސިލްގެ ރައީސް ނިންމަވާފައިވާ ކަމަށާއި، އެއީ މިހާރުވެސް ފައިސާގެ ޗެކްތަކާއި ފައިސާގެ އެންމެހައި ކަންތައްތަކުގައި ސޮއިކުރައްވަމުންދަނީ ރައީސާއި ނައިބްރައީސް އަދި ޒިންމާދާރުވެރިޔާ ކަމަށްވުމުންނެވެ. ދެންއެއަށްފަހު  ކޮންމެ މެމްބަރަކުވެސް އެމެމްބަރަކު މަސްޢޫލުވާނެ ދާއިރާއެއް އަމިއްލަފުޅަށް ނެންގުމަށް ރިޔާސަތުން ފުރުޞަތު ހުޅުވާލެއްވިއެވެ.

ހުށަހެޅިފައިވާ ކަރުދާހުން މެމްބަރުން ނެންގެވި ދާއިރާތައް:

•    މޯލްޑިވްސް ޕޮލިސްސަރވިސްއާއި، ޑިޒާސްޓަރމެނޭޖުމަންޓް، ޑިޕާރޓްމަންޓް އޮފް ޕެނިޓެންސަރީ ، އެޓަރނީޖެނެރަލްގެ އޮފީސް ، މިދާއިރާތަކުގެ އިތުރުން އަތޮޅު ރައްޔިތުންގެ ތަރައްޤީ ފަންޑުން ނަގާފައިވާ ލޯނުތަކުގެ ފައިސާ ހޯދުން، އަތޮޅު ރައްޔިތުންގެ މާލިއްޔަތު މުއްސަދިކުރުމަށް ކުރަންޖެހޭ އެންމެހާ ކަންތައް. މިކަންތައްތައް ބެލެހެއްޓެވުން ޙަވާލުވެވަޑައިގެންނެވީ އިސްދޫ ދާއިރާގެ މެމްބަރު އަޙްމަދު އާސިފެވެ.

•    މިނިސްޓްރީ އޮފް ހައުސިންގ އެންޑް އެންވަޔަރަންމަންޓާއި، ޕްލޭނިންގ އެންޑް ނެޝަނަލް ޑިވެލޮޕްމަންޓްގެ ކަންކަތައްތަކުގެ އިތުރުން އެކިއެކި ދާއިރާތަކުން އަތޮޅުގައި ހިންގަވާ ޕްރޮޖެކްޓްތަކާބެހޭ މަސައްކަތް  ބެލެހެއްޓެވުމާ ޙަވާލުވެވަޑައިގަތީ ގަމު ދާއިރާގެ މެމްބަރު މުޙައްމަދު ރަޝީދެވެ.

•    މިނިސްޓްރީ އޮފް ހެލްތް އެންޑް ފެމިލީއާއި، ނެޝަނަލް ސޯޝަލް ޕްރޮޓެކްޝަން އެޖެންސީގެ އިތުރުން އެކިއެކި ކަންކަމުގައި އަތޮޅަށް ވަޑައިގަންނަވާ ޓީމުތަކާބެހޭ ކަންތައް ތަކާ، އެކިއެކި މުނާސަބަތުތައް ފާހަގަ ކުރުމުގެ މަސައްކަތް ބެލެހެއްޓެވުން ޙަވާލުވެވަޑައިގަތީ މާވަށު ދާއިރާގެ މެމްބަރު އަޙްމަދު މުޢިއްޒުއެވެ.

•    މިނިސްޓްރީ އޮފް ފިޝަރީޒް އެންޑް އެގްރިކަލްޗަރއާއި، ހޯމްއެފެއާޒް އަދި ޔޫތް އެންޑް ސްޕޯޓްސްގެ އިތުރުން ގޮއިފާލައްބަ ހިންނަފަދަ ތަންތަން ބެލެހެއްޓުން މިކަންތައްތައް ބެލެހެއްޓެވުން ޙަވާލުވެވަޑައިގަތީ މާވަށު ދާއިރާގެ މެމްބަރު މުމްތާޒް ފަހުމީއެވެ.

•    ޕަބްލިކްވަރކްސްއާއި، ޓްރާންސްޕޯޓް އޮތޯރިޓީގެ އިތުރުން އަތޮޅުއޮފީހާއި ރަށުއޮފީސްތަކުގައި ބޭނުންކުރެވޭ ވެހިކަލްތަކުގެ ތެރެއިން ޤަވާއިދުން ރަޖިސްޓްރީ ކުރަންޖެހޭ ތަކެތި ރަޖިސްޓްރީ ކުރުމާއި، ލައިސަންސްފީ އާއި އަހަރީފީ އާއި ކުލި ދެއްކުން މިކަންތައްތައް ބެލެހެއްޓެވުން ޙަވާލުވެ ވަޑައިގަތީ ފޮނަދޫ ދާއިރާގެ މެމްބަރު ޝާހީން އިސްމާޢީލް.

•    މިނިސްޓްރީ އޮފް އިސްލާމިކް އެފެއާޒް، ނެޝަނަލް ރަޖިސްޓްރޭޝަން އަދި އެޑިޔުކޭޝަން މިނިސްޓްރީގެ އިތުރުން ޖަލްސާ ވޯކުޝޮޕް ފަދަ ކަންތައް އިންތިޒާމު ކުރުމުގެ ކަންތައް ބެލެހެއްޓެވުން ޙަވާލުވެވަޑައިގެންނެވީ އިސްދޫ ދާއިރާގެ މެމްބަރު އިބްރާހިމް ހަމީދެވެ.

3-    އަތޮޅު ކައުންސިލްގެ 05 ވަނަ ޖަލްސާގެ ޔައުމިއްޔާ ފާސްކުރުން.


ޔައުމިއްޔާއަށް އެއްވެސް އިސްލާހެއް ގެންނަންފެނޭތޯ ރިޔާސަތުން އެއްސެވުމުން އެއްވެސް އިސްލާހެއް ހުށަނޭޅި ހާޟިރުވެތިބި މެންބަރުންގެ އިއްތިފާގުން ޔައުމިއްޔާ ފާސްކުރެވުނެވެ.

4-    އަތޮޅު ކައުންސިލްގެ 06 ވަނަ ޖަލްސާގެ ޔައުމިއްޔާ ފާސްކުރުން.


ޔައުމިއްޔާއަށް އެއްވެސް އިސްލާހެއް ގެންނަންފެނޭތޯ ރިޔާސަތުން އެއްސެވުމުން އެއްވެސް އިސްލާހެއް ހުށަނޭޅި ހާޟިރުވެތިބި މެންބަރުންގެ އިއްތިފާގުން ޔައުމިއްޔާ ފާސްކުރެވުނެވެ.

5-    އަތޮޅު ކައުންސިލްގެ 07 ވަނަ ޖަލްސާގެ ޔައުމިއްޔާ ފާސްކުރުން.


ޔައުމިއްޔާއަށް އެއްވެސް އިސްލާހެއް ގެންނަންފެނޭތޯ ރިޔާސަތުން އެއްސެވުމުން އެއްވެސް އިސްލާހެއް ހުށަނޭޅި ހާޟިރުވެތިބި މެންބަރުންގެ އިއްތިފާގުން ޔައުމިއްޔާ ފާސްކުރެވުނެވެ.

މަޢުލޫމާތު ހިއްސާކުރެވުނު ކަންތައްތައް:

1-    ކައުންސިލްގެ އިދާރާގެ ކުޅިވަރު ފެންޑާގައި ހުރި ކީރިތިޤުރުއާނުގެ ދިވެހިތަރުޖަމާތަކާ މެދު ޢަމަލުކުރާނެ ގޮތެއް އަންގަވައިދެއްވުމަށް އިސްލާމިކް އެފެއާޒަށް ހުށަހެޅިމައްސަލައިގާ އިސްލާމިކް އެފެއާޒުން މަޝްވަރާދެއްވާފައިވަނީ  ބޭނުންފުޅުވާ ފަރާތްތަކަށް ތަރުޖަމާ ބެހުމަށެވެ. މި އިދާރާއިން ފޮނުވި މެސެޖަށް ލިޔުމުން ޖަވާބް ލިބުމުން ތަރުޖަމާ ބޭނުންފުޅުވާ ފަރާތްތަކަށް ތަރުޖަމާ ބެހުމަށް ނިންމެވިއެވެ.

2-    ކައުންސިލް އިދާރާގެ އޮނިގަނޑު ސިވިލްސަރވިސް ކޮމިޝަނުން އެކުލަވާލާފައިވާތީ، އެކަމާބެހޭގޮތުން މުވައްޒަފުންނާ ބައްދަލުކުރުމަށް ހަމަޖެހިފައިވާ ކަމުގައި އަޅުގަނޑު ދެންނެވީމެވެ.

3-    އަތޮޅުކައުންސިލް އިދާރާގެ ތަކެއްޗާއިބެހޭގޮތުން ގޮތެއްނިންމުމަށްޓަކައި އެމައްސަލަ މިހާރު ކޯޓަށް ހުށަހަޅުއްވާފައިވާނޭކަމަށް އަޅުގަނޑު ދެންނެވީމެވެ.

4-    އަތޮޅު ޤުރުޢާން މުބާރާތުގައި މިއަތޮޅުގެ ރަށްރަށުން ބައިވެރިކުރާ ކުދިންގެ ނަންތައް މިހިނގާ އޭޕްރީލް 10 ގެ ކުރިން ފޮނުއްވައިދިނުމަށް އެދިފައިވާނޭކަމުގައި މެމްބަރުންގެ މަޢުލޫމާތަށްޓަކައި އަޅުގަނޑު ދެންނެވީމެވެ.

5-    މީޑިއާއަށް މަޢުލޫމާތުދޭނޭ ފަރާތެއް ކަނޑައެޅުމުގެ މުހިންމުކަމާއިބެހޭގޮތުން މަޝްވަރާކުރެވުމުން ދެންއޮންނަ ބައްދަލުވުމަށް އެމައްސަލަ އެޖެންޑާކޮށްގެން ކުރިއަށްގެންދިޔުމަށް ނިންމެވީމެވެ.



                                           އިބްރާހީމް އަނީސް
                                            ކައުންސިލްގެ ރައީސް

 ކައުންސިލްގެ މެމްބަރުން


•    ގަމުދާއިރާގެ މެމްބަރ      އަލްފާޟިލް މުޙައްމަދު ފާއިދު (ނައިބްރައީސް)    •   

•    މާވަށު ދާއިރާގެ މެމްބަރ    އަލްފާޟިލް މުމްތާޒު ފަހުމީ    •   

•    ފޮނަދޫ ދާއިރާގެ މެމްބަރ    އަލްފާޟިލް ޝާހީން އިސްމާޢީލް    •   

•    މާވަށު ދާއިރާގެ މެމްބަރ    އަލްފާޟިލް އަޙުމަދު މުއިއްޒު    •   

•    ގަމުދާއިރާގެ މެމްބަރ      އަލްފާޟިލް މުޙައްމަދު ރަޝީދު    •   

އިސްދޫދާއިރާގެ މެމްބަރ    އަލްފާޟިލް އިބްރާހިމް ހަމީދު    •   

އިސްދޫދާއިރާގެ މެމްބަރ    އަލްފާޟިލް އަޙްމަދު އާޞިފް    •